नगर अर्बनच्या निडवणुकीमुळे राजकीय वातावरण तापले...

अहमदनगर ः  मागील दोन वर्षांपासून प्रशासकीय कारभार अनुभवणार्‍या नगर अर्बन  बँकेची अखेर निवडणूक होणार आहे. केंद्रीय सहकार निबंधकांच्या पत्रानुसार पुण्याच्या राज्य सहकार आयुक्त कार्यालयातील नागरी बँका विभागाचे उपनिबंधक आनंद कटके यांनी नगर अर्बन बँकेची निवडणूक घेण्यासाठी नगरचे जिल्हा सहकार उपनिबंधक दिग्विजय आहेर यांची नियुक्ती केली आहे. यानंतर जिल्हा उपनिबंधक यांनी यादी करण्याच्या सूचना बँकेला दिल्या आहेत.

या नियुक्तीनंतर आहेर यांनी बँकेच्या प्रशासनाला पत्र देऊन बँकेची मतदार यादी मागितली आहे. स्थापनेचे 111 वे वर्ष साजरे करणार्‍या नगर अर्बन बँकेचा कारभार नेहमी गाजत राहिला आहे. बँकेचे राजकारण, कर्ज वाटपातील गैरव्यवहार व अनियमितता तसेच अन्य काही कारणाने चर्चेत असलेल्या या बँकेचे तत्कालीन संचालक मंडळ दोन वर्षांपूर्वी रिझर्व्ह बँकेने बरखास्त करून बँकेवर प्रशासक नियुक्ती केली आहे. 

भाजपचे नगरचे माजी खासदार दिवंगत दिलीप गांधी यांनी वर्चस्व गाजवलेल्या या बँकेवर प्रशासक नियुक्तीनंतर हा विषय राज्यात गाजला होता. मात्र, आता हे प्रशासक राजही संपुष्टात येणार आहे व बँक पुन्हा नवनियुक्त संचालक मंडळाच्या ताब्यात देण्याच्या हालचाली सुरू झाल्या आहेत. 

सात वर्षांनी निवडणूक नगर अर्बन बँकेच्या संचालक मंडळाची निवड़णूक याआधी 2014मध्ये झाली होती. त्यामुळे 2019मध्ये ही निवडणूक अपेक्षित होती. पण त्यावेळी रिझर्व्ह बँकेने मुदत संपण्यापूर्वीच संचालक मंडळ बरखास्त करून प्रशासकाची नियुक्ती केली.

2014 मध्ये झालेल्या निवडणुकीत माजी खा. (स्व.) दिलीप गांधी व माजी अध्यक्ष (स्व.) सुवालाल गुंदेचा यांच्या नेतृत्वाखालील सहकार पॅनेल व माजी संचालक सुभाष भंडारी व राजेंद्र गांधी यांच्या नेतृत्वाखालील जनसेवा मंडळ यांच्यात लढत झाली होती. पण यात गांधी-गुंदेचा मंडळाने महाराष्ट्रातील 17 व परराज्यातील 1 अशा सर्व 18 जागा जिंकल्या होत्या.

बँकेचे एकूण 1 लाख 15 हजार सभासद व सुमारे 45 शाखा आहेत. ज्या सभासदांकडे 1 हजार रुपयांचे शेअर्स आहेत,  अशांना मतदानाचा अधिकार असून, मागच्या निवडणुकीत असे 48 हजार सभासद होते व आता होणार्‍या निवडणुकीसाठी सुमारे 55 हजार मतदार अपेक्षित आहेत. 

प्रशासक राज, बँकेती गैरव्यवहाराबाबत दाखल झालेले तीन गुन्हे, फरार असलेले काही माजी संचालक, बँकेचा वाढता एनपीए अशा विविध पार्श्वभूमीवरील या निवडणुकीकडे लक्ष लागले आहे.