नगर ः दक्षिण लोकसभा मतदारसंघातून राष्ट्रवादीकडून उमेदवारी चाचपणी सुरु झालेली आहे. यामध्ये अनेक नावे चर्चेत असले तरी प्रामुख्याने माजी आमदार दादाभाऊ कळमकर व आमदार निलेश लंके ही दोन नावे आघाडीवर आहेत. त्यामुळे आता पक्ष श्रेष्ठी कोणाला हिरवा कंदील देतात, याकडे सर्वांचे लक्ष लागले आहे.
राष्ट्रवादी काॅंग्रेसची आज सव्वा अकरा वाजता मुंबई येथे पार्टी कार्यालयात बैठक झाली. या बैठकीत अहमदनगर दक्षिण लोकसभा मतदार संघाच्या बाबतीत राष्ट्रवादी काॅंग्रेस पार्टीची महत्वाची बैठक होती. यामध्ये काही संभाव्य उमेदवरांच्या नावाची चर्चा करण्यात आलेली आहे. या बैठकीला खासदार शरद पवार, आमदार जयंत पाटील, अजित पवार, आमदार छगन भुजबळ, खासदार सुनील तटकरे, खासदार श्रीनिवास पाटील, आमदार हसन मुश्रीफ यांच्यासह पक्ष निरीक्षक माजी महापौर अंकुश काकडे, जिल्हाध्यक्ष राजेंद्र फाळके, आमदार प्राजक्त तनपुरे, आमदार संग्राम जगताप, माजी आमदार दादाभाऊ कळमकर, माजी आमदार राहुल जगताप, माजी आमदार चंद्रशेखर घुले, घनःश्याम शेलार, अंबादास गारुडकर, राजेंद्र कोठारी आदी उपस्थित होते.
मागील निवडणुकीत ऐन वेळी उमेदवार देण्यात आल्यामुळे पक्षाला एक जागा गमविण्याची वेळ आली. मात्र लोकसभेतील अपयश जिल्ह्यात विधानसभेत धुवून निघाले आहे. त्यामुळे आगामी निवडणुकीत पुन्हा अपयश येऊ नये, यासाठी आतापासूनच उमेदवार जाहीर झाल्याने मतदारसंघात पक्ष बांधणी करणे सोपे जाईल.
त्यामुळे मुंबईत तातडीची बैठक घेऊन चर्चा झालेली आहे. यामध्ये पाच ते सहा नाने पुढे आलेले आहेत. मात्र प्रामुख्याने माजी आमदार दादाभाऊ कळमकर व आमदार निलेश लंके यांच्या नावाचीच चर्चा झाली.
यामध्ये दादाभाऊ कळमकर यांना पक्षाने संधी द्यावी, असा सूर ज्येष्ठ नेत्यांमधून निघाला. काही तरुण आमदारांनीही त्यांच्या नावाला संधी देण्यात आली. तरुणांसह ज्येष्ठ कार्यकर्त्यांनीही आमदार निलेश लंके यांना संधी द्यावी, असे मत व्यक्त केले.
इतर नेत्यांचीही नावे चर्चेत आलेली आहे. त्यातील काहींना विधानसभा तर काहींना विधान परिषदेसाठी संधी द्यावी, अशी अपेक्षा या वेळी व्यक्त करण्यात आली.
कोविड काळात आमदार निलेश लंके यांनी चांगले काम केलेले आहे. त्या कामाचा फायदा आगामी निवडणुकीत त्यांना होईल, अशी अपेक्षा व्यक्त केली जात आहे. त्यामुळफे लंके यांनाच पक्षाने लोकसभेसाठी संधी द्यावी, अशी अपेक्षा व्यक्त केली जात आहे.
भाजपाचे संभाव्य उमेदवार डाॅ. सुजय विखे यांना लंकेच चांगली फाईट देतील, अशी चर्चा दक्षिण मतदार संघातील कार्यकर्त्यांची आहे. तेच मत अनेकांनी या बैठकीत व्यक्त केलेले आहे.
दादाभाऊ कळमकर यांचा दक्षिणेत चांगला संपर्क आहे. त्यामुळे त्यांना संधी द्यावी, अशी मागणी करण्यात आली. शिवाय पक्ष बांधणीसाठी कळमकर यांनी खूप योगदान दिलेले आहे. त्यामुळे सर्वांनी मिळून त्यांना आता खासदार करून त्यांनी पक्षाशी एकनिष्ठेने केलेल्या कामाचे फळ त्यांना द्यावे, अशी इ्च्छा अनेकांनी व्यक्त केली.
Post a Comment