शिर्डी : साईबाबा संस्थान विश्वस्त व्यवस्था शिर्डीच्या वतीने श्री द्वारकामाई मंदिराच्या दर्शनाच्या वेळेत बदल करण्यात आले असून गुरुवार १ जून २०२३ पासून श्री द्वारकामाई सभामंडप साईभक्तांना दर्शनासाठी रात्रभर खुले राहणार असल्याची माहिती साई संस्थानचे मुख्य कार्यकारी अधिकारी राहुल जाधव यांनी दिली.
श्री क्षेत्र शिर्डी येथे देश-विदेशातून लाखो भाविक श्री साईबाबांच्या समाधीच्या दर्शनाकरीता येत असतात. या ठिकाणी आल्यानंतर भाविक श्रींच्या समाधीसह द्वारकामाई, चावडी व गुरुस्थान आदी ठिकाणी प्राधान्याने दर्शनाकरिता जातात. बाबांनी त्यांच्या हयातीत संपुर्ण जीवन हे द्वारकामाई येथे व्यतित केले.
या ठिकाणाहून बाबांनी अनेक भाविकांना अन्नदान, रुग्ण सेवा, ज्ञानदान या त्रिसुत्रीची शिकवण दिली. तसेच याठिकाणी बाबांनी असंख्य भाविकांना आपल्या लिलाही दाखवल्या. त्यामुळे द्वारकामाईस अनन्य साधारण महत्व आहे. साईभक्त व शिर्डी ग्रामस्थांकडून व्दारकामाई मंदिर पूर्वीप्रमाणे दर्शनासाठी खुले करावे, अशी मागणी वारंवार होत होती.
त्याअनुषंगाने संस्थानच्या तदर्थ समितीच्या नुकत्याच झालेल्या सभेत श्री द्वारकामाई सभामंडप साईभक्तांना दर्शनासाठी रात्रभर खुले ठेवण्याबाबतचा निर्णय घेण्यात आला. त्यानुसार श्रींचे द्वारकामाई मंदिराच्या दर्शनाच्या वेळेत बदल करण्यात आला असून गुरुवार, दि. ०१ जुन पासून पहाटे ५. ते रात्रौ ९.३० (पूर्वीप्रमाणे) यावेळेत श्री द्वारकामाईतील गाभारा दर्शन सुरु राहिल.
तसेच श्रीद्वारकामाई सभामंडप साईभक्तांना दर्शनासाठी रात्रभर खुले ठेवण्यात येणार असल्याचे सांगून भाविकांनी या सुविधेचा लाभ घ्यावा, असे आवाहन श्री साईबाबा संस्थानचे प्र. मुख्य कार्यकारी अधिकारी राहुल जाधव यांनी केले आहे.
Post a Comment