शेवगाव ः विधानसभा निवडणूक जवळ येत आहे तशी इच्छुक उमेदवारांची संख्या देखील वाढत आहे. शेवगाव पाथर्डी विधानसभा मतदारसंघामध्ये इच्छुक उमेदवारांची संख्या वाढत आहे. माजी जिल्हा परिषद सदस्य हर्षदा काकडे यांनी कुठल्याही परिस्थितीत विधानसभा निवडणूक लढवण्याची तयारी दाखवली आहे. त्यामुळे शेवगाव-पाथर्डी विधानसभा मतदारसंघातील राजकीय वातावरण चांगलेच तापले आहे.
हर्षदा काकडे यांच्या भूमिकेने भाजपच्या आमदार मोनिका राजळे यांना मोठा धक्का बसण्याची शक्यता आहे. एकेकाळी भाजपच्या जिल्हा परिषद सदस्य राहिलेल्या हर्षदा काकडे यांना 2014 आणि 2019 या दोन्ही निवडणुकांमध्ये भाजपकडून उमेदवारी मिळाली नाही, मात्र आता मिळेल त्या पक्षाकडून उमेदवारी करायची असा निर्धार त्यांनी केलेला आहे.
पक्षांकडून उमेदवारी मिळाली नाही तर अपक्ष निवडणूक लढविण्याचा निर्धार त्यांनी केलेला आहे. शेवगाव-पाथर्डी मतदारसंघात सध्या भाजपच्या मोनिका राजळे आमदार असून राष्ट्रवादी शरद पवार गटाकडून प्रताप ढाकणे निवडणुकीची तयारी करत आहेत. याबरोबरच राष्ट्रवादी अजित पवार गटाकडून चंद्रशेखर घुले देखील मतदार संघामध्ये चाचपणी करत आहेत.
त्यातच हर्षदा काकडे यांनी देखील मतदार संघामध्ये चाचपणी केली असून कुठल्याही परिस्थितीत आपण ही निवडणूक लढणार असल्याचे स्पष्ट केले आहे. त्यामुळे या मतदारसंघामध्ये नेमके किती उमेदवार उभे राहतील आणि कोण कोणाला पाठिंबा देईल? हे पाहणे महत्त्वाचे ठरणार आहे.
या निवडणुकीत ढाकणे, राजळे, घुले व काकडे या चारही जणांनी उमेदवारी प्रतिष्ठेची केलेली आहे. त्यामुळे आता यातील कोण उभे राहणार आहे. कोण माघार घेणार याची सर्वांना उत्सुकता आहे. तसेच कोण कोणाला पाठींबा देणार याकडे सर्वांचे लक्ष लागलेले आहे.
Post a Comment