श्रीगोंदा : मोहनगी वृक्ष लागवड प्रस्तावांना मंजुरी मिळावी या मागणीसाठी क्रांती सेनेतर्फे आंदोलनाचा इशारा देण्यात आला होता. या मागणीची दखल घेत प्रस्तावांना मंजुरी देण्याबाबत आदेश देण्यात आल्याचे पत्र क्रांती सेनेला मग्रारोहयो प्रशासनातर्फे देण्यात आले आहे.
जिल्ह्यातील मोहगनी वृक्ष लागवडीचे प्रस्ताव मग्रारोहयो अंतर्गत मंजुरीच्या प्रतीक्षेत असल्याबाबत अखिल भारतीय क्रांतीसेनेचे जिल्हाध्यक्ष सुभाष दरेकर व श्रीगोंदा तालुका अध्यक्ष संदीप डेबरे यांनी श्रीगोंदा गटविकास अधिकारी प्रशांत काळे यांची भेट घेत प्रस्ताव मंजूर करण्याबाबत निवेदन दिले होते.
मोहगनी वृक्ष लागवड प्रस्तावांना अहमदनगर जिल्ह्यात मंजुरी मिळत नसल्याने शेतकर्यांनी अखिल भारतीय क्रांतीसेनेचे जिल्हाध्यक्ष सुभाष दरेकर यांची भेट घेत याबाबत तक्रार केली होती.
दरेकर यांनी शेतकऱ्यांच्या तक्रारीची तातडीने दखल घेत श्रीगोंदा गटविकास अधिकारी प्रशांत काळे व जिल्हा परिषद अहमदनगर मग्रारोहयोचे उपजिल्हा कार्यक्रम समन्वयक वेले यांना निवेदन देत प्रस्ताव मंजूर करून शेतकऱ्यांना लवकरात लवकर न्याय द्यावा,अन्यथा अखिल भारतीय क्रांतीसेनेचे प्रदेश संपर्क प्रमुख मधुकर म्हसे पाटील यांच्या नेतृत्वाखाली आंदोलन करण्याचा इशारा दिला होता.
याबाबत जिल्हा परिषदेचे उपजिल्हा कार्यक्रम समन्वयक मग्रारोहयो यांनी दखल घेत मग्रारोहयो अंतर्गत ग्रामपंचायत मार्फत वृक्ष लागवड राबवण्याबाबत पंचायत समितीकडील कृषी अधिकारी यांनी तांत्रिक मान्यता द्यावी तसेच प्रशासकीय मान्यता गटविकास अधिकारी यांनी द्यावी, अशा सूचना जून महिन्यात दिल्या आहेत, असे दिलेल्या पत्रकात नमूद केले आहे.
Post a Comment