पारनेर : प्राथमिक शिक्षकांना वैयक्तिक कामाकरिता जिल्ह्याच्या कानाकोप-यातून जिल्हा परिषदेत यावे लागणे हि बाब जिल्हा परिषदेच्या दृष्टिने निश्चित अभिमानास्पद नाही.त्यामुळे प्रशासकिय यंत्रणेने प्रलंबित कामाचा निपटारा जलदगती करायला हवा, असे प्रतिपादन आमदार डॉ. सुधीर तांबे यांनी केले.
शिरूर शहर प्राथमिक शिक्षक मित्र मंडळ व पा रनेरकर सामाजिक विकास संस्था यांच्या विद्यमाने शिरूर येथे गुणवंत शिक्षक गौरव समारंभ आयोजित करण्यात आला होता. या कार्यक्रमाच्या अध्यक्षस्थानी महाराष्ट्र राज्य शिक्षक परिषदेचे राज्य संपर्कप्रमुख रावसाहेब रोहोकले गुरूजी होते. प्रमुख पाहुणे म्हणून विधान परिषद सदस्य डॉक्टर सुधीर तांबे होते.
यावेळी व्यासपीठावर शिक्षक बँकेचे संचालक आविनाश निंभोरे, विस्ताराधिकारी राजेंद्र पवार, भाऊसाहेब डेरे, उपाध्यक्ष संजय शेळके, गुरुमाऊली मंडळाची जिल्हा अध्यक्ष विकास डावखरे, विकास मंडळाचे माजी अध्यक्ष संजय शिंदे, सुनील दुधाडे, संतोष खामकर, बाबा धरम आदी उपस्थित होते.
डॉ. सुधीर तांबे म्हणाले, शिरूर शहरात राहणारा अहमदनगर जिल्ह्यातील प्राथमिक शिक्षक येथे राहून देखील एकमेकांच्या सुख दुःखामध्ये सहभागी होऊन एकमेकांना आधार देण्याचे काम करत आहे.
समाजाला दिशादर्शक अशा कामातून प्राथमिक शिक्षकांचे प्रश्न सोडविण्यासाठी सातत्याने रावसाहेब रोहोकले गुरुजी यांच्याबरोबर मी कार्यरत असून तुमच्या सर्वांच्या प्रश्नांना न्याय देण्याची भूमिका भविष्यामध्ये सरकारकडून घेतली जाईल.
राज्यातील शाळा सुरू करणे बाबत संघटनेने घेतलेली भूमिका सकारात्मक असून याबाबत सरकारने गांभिर्याने विचार करायला हवा. तुमचे प्रश्न सोडवण्यासाठी मी कटिबद्ध आहे असे अभिवचन यावेळेस डॉ. तांबे यांनी दिले.
रावसाहेब रोहोकले म्हणाले की, सेवानिवृत्ती नंतरही आपण डॉ. सुधीर तांबे यांसारख्या माणसांकडून काम कसे करावे याबाबत शिकवण घेत आहोत.
कार्यक्रमाच्या निमित्ताने जिल्हा जिल्हा पुरस्कार प्राप्त शिक्षक राजेंद्र पोटे, तुकाराम आडसुळ, रामदास नरसाळे, शोभा कोकाटे यांचा तसेच सलाम बॉम्बे या संस्थेमार्फत राज्यामध्ये पाचव्या क्रमांकाने गौरविण्यात आलेल्या व्यसनमुक्तीच्या शॉर्ट फिल्म मधील कलाकार परशुराम सोंडकर, बाळू तरटे, संजय शिर्के, छगन चेडे, हरी साळुंखे, शॉर्ट फिल्मचे निर्माते ओंकार पोटे तसेच विविध सामाजिक संस्थांचे पुरस्कार प्राप्त शिक्षक अनुक्रमे शोभा लाळगे, संतोष साबळे, संगीता भदे यांना डॉ. सुधीर तांबे यांच्या हस्ते गौरविण्यात आले. ज्ञानेश्वर इंगळे यांनी सूत्रसंचान तर रासकर यांनी आभार मानले.
सर्व शिक्षा अभियानांतर्गत असलेली खाती बँक ऑफ महाराष्ट्रमध्ये उघडण्याबाबत राज्यस्तरावरून आदेशित केले आहे. हे शिक्षकांच्या दृष्टीने गैरसोयीचे आहे. त्यामुळे हा निर्णय तातडीने रद्द करण्यात यावा अशी मागणी शिक्षक परिषदेचे जिल्हाध्यक्ष प्रवीण ठुबे यांनी केली.
या वेळी प्रविण ठुबे यांनी महाराष्ट्र बँकेतील खाते उघडण्याची अट रद्द करण्याच्या मागणीची दखल डॉ. तांबे यांनी घेतली. मंगळवारी मंत्रालयामध्ये शिक्षण मंत्री वर्षा गायकवाड यांच्या समवेत बोलून सदर निर्णय तात्काळ रद्द करण्यात येईल, अशी ग्वाही डॉ. तांबे यांनी दिली.
Post a Comment