जालना : श्रीगोंद्यातील घटना ताजी असतानाच पुण्यात बँकेवरील दरोड्याची घटना घडली. या दोन्ही घटनेचा तपास सुरु असतानाच जालना जिल्ह्यातील अंबड तालुक्यातील शहागड येथे बुलडाणा अर्बन बँकेवर भर दिवसा सशस्त्र दरोडा पडला.
दरोडेखोरांनी रिव्हॉल्व्हरचा धाक दाखवत बँकेतील पैसे व लॉकरमधील दागिने लंपास केले. संबंधित घटना ही आज (28 ऑक्टोबर) दुपारी घडली. तीन बंदूकधारे बँकेत शिरले. त्यांनी बँकेतील कर्मचाऱ्यांना बंदुकीचा धाक दाखवत 25 लाख व मोठ्या प्रमाणावर लॉकरमधील सोने लंपास केले.
या घटनेची माहिती मिळताच गोंदी पोलिस ठाण्याचे पोलिस अधिकारी घटनास्थळी दाखल झाले. हा सर्व प्रकार सीसीटीव्ही कॅमेऱ्यात कैद झाला आहे.
पोलिसांकडून सध्या या प्रकरणाचा तपास सुरु आहे. तीन आरोपी तोंडाला रुमाल बांधून आतमध्ये शिरले होते. यावेळी त्यांनी बँकेतील कर्मचाऱ्यांसमोर थेट बंदूक उगारली. त्यामुळे कर्मचारी घाबरले. आरोपी जोरजोरात ओरडत कॅश काउन्टरजवळ आले. त्यांनी कॅशिअरवरही बंदूक रोखली. त्यानंतर त्यांनी 25 लाखांची रोकड लंपास केली.
यासोबत दरोडेखोरांनी बँकेतील काही लॉकर फोडले. त्यांनी लॉकरमधील सोन्याचे दागिने देखील पळवले आहेत. त्यांनी किती किमतीचे दागिने पळवले याबाबतची माहिती अद्याप समोर आलेली नाही.
पण या घटनेमुळे परिसरात खळबळ उडाली आहे. दरोड्याची माहिती मिळताच काही खातेदारांनी बँकेबाहेर गर्दी केली. काही खातेदारांच्या लॉकरमधून मौल्यवान वस्तू दरोडेखोरांनी चोरुन नेल्याची माहिती आहे. पोलिस या प्रकरणी सविस्तर तपास करत आहेत.
Post a Comment