पारनेर : पुढील वर्ष निवडणुकांचे आहे. माझे हात बळकट करण्यासाठी आगामी जिल्हा परिषद, पंचायत समिती, बाजार समिती तसेच पारनेर नगर पंचायतीच्या निवडणुकीत राष्ट्रवादीच्या उमेदवारांना मीच उमेदवार आहे, असे समजून भरघोस मतदान करण्याचे आवाहन आमदार नीलेश लंके यांनी केले.
जामगाव ते सारोळा आडवाई रस्ता सुधारणा करणे्यासाठी एक कोटी ८२ लाख १५ हजार, जामगाव माथा साठे वस्ती ते लोणीहवेली रस्ता सुधारणा करण्यासाठी कोटी ८६ लाख ६६ हजार, धोत्रे नगर कल्याण महामार्ग ते धोत्रे रस्ता सुधारणा करण्यासाठी दोन कोटी ३६ लाख २८ हजार, भाळवणी राज्य मार्ग ते हनुमानवाडी रस्ता सुधारणा करण्यासाठी एक कोटी ५८ लाख २७ हजार, भाळवणे ते दैठणेगुंजाळ रस्ता सुधारणा करण्यासाठी ५० लाख, कोल्हापुरी बंधारा, जामगांव हाडोळेवस्तीसाठी ३७ लाख ६५ हजार, कोल्हापुरी बंधारा जामगांव मेहेरवस्तीसाठी ४८ लाख ६९ हजार या कामांचे भूमिपूजन तसेच लोकार्पण आमदार निलेश लंके यांच्या हस्ते रविवारी करण्यात आले. त्यावेळी ते भाळवणी येथे आयोजित करण्यात आलेल्या कार्यक्रमाप्रसंगी बोलत होते.
विधानसभा निवडणुकीच्या निकालास दोन वर्षे पूर्ण झाल्याबददल यावेळी आमदार निलेश लंके यांची लाडू तुला करण्यात आली. पंचायत समितीचे माजी सदस्य गंगाराम रोहकले हे कार्यक्रमाच्या अध्यक्षस्थानी होते.
यावेळी सुरेश धुरपते, प्रशांत गायकवाड, सुनंदा धुरपते, अशोक सावंत, अॅड. राहुल झावरे, दादा शिंदे, संभाजी रोहोकले, जितेश सरडे, किशोर यादव, विजय औटी, प्रा. संतोष भुजबळ, मुकुंद शिंदे, दत्ता कोरडे, रियाज पठाण, बबलू रोहोकले, विक्रमसिंह कळमकर, अभयसिंह नांगरे, राजेश चेडे, कारभारी पोटघन, सत्यम निमसे आदी उपस्थित होते. बाबाजी तरटे यांनी प्रास्ताविक केले.
आ. लंके म्हणाले, आपल्या मतदासंघात फक्त आणि फक्त घडयाळाचा गजर होणार आहे. कुठल्याही परिस्थितीत सर्व सत्ता ताब्यात घेतल्याशिवाय मी स्वस्थ बसणार नाही अशी प्रतिज्ञाही त्यांनी केली.
उपमुख्यमंत्री अजित पवार यांच्या रूपाने एक आदर्श अर्थमंत्री राज्याला लाभला आहे. आपल्या मतदारसंघाला झुकते माप देण्याची भूमिका नेेहमीच पवार यांनी घेतली आहे. कोरोना संकटामुळे राज्याच्या तिजोरीवर मोठा ताण आहे, अशाही स्थितीमध्ये पवार यांनी मतदारसंघातील विकास कामांसाठी निधी कमी पडू दिला नाही.
अर्थसंकल्पातही तालुक्यातील कामांसाठी भरभरून निधी दिला. पाण्याच्या अनेक योजना पूर्णत्वास नेण्यासाठी पक्षाचे अध्यक्ष शरद पवार उपमुख्यमंत्री अजित पवार हे आग्रही आहेत. आपल्या मतदासंघावर विशेष लक्ष असलेल्या या पक्षाची ताकद वाढविण्याची जबाबदारी आता आपली आहे.
विधानसभा निवडणुकीत तुम्ही मला भरभरून मते दिली. आता आगामी निवडणुकीतही मी उमेदवार आहे हे समजून जिल्हा परिषद व पंचायत समिती, बाजार समिती तसेच नगर पंचायतीच्या निवडणुकीत मतदान करण्याचे आवाहन त्यांनी केले.
आ. लंके म्हणाले, आज भाळवणी येथे कार्यक्रम पार पडत आहे. भाळवणीकरांनी मला भरभरून दिले. त्यांच्या प्रेमातून उतराई होण्यासाठी त्यांनी केलेल्या मागण्यांचा विचार करून विकास कामांना निधी उपलब्ध करून दिला.
उर्वरीत मागण्याही पूर्ण करण्याची ग्वाही त्यांनी दिली. भाळवणीकरांनी काय कमी केले ? असा सवाल करीत कोरोना काळात शरदचंद्र पवार आरोग्य मंदिराच्या माध्यमातून भुजबळ परिवाराने मोठे योगदान दिले. ते विसरता येणार नाही.
भाळवणी येथे आरोग्य मंदिर असल्यामुळे देशभर,जगभर भाळवणीचे नाव झाले. बाहेरचे लोक तर तुम्ही भाळवणीचे आमदार आहेत का असेही विचारून लागले आहेत. या आरोग्य मंदिरात ३० हजारांपेक्षाही जास्त करोना रूग्ण बरे होऊन गेले. तेथे एकही रूग्ण दगावला नाही याचीही आठवण आमदार लंके यांनी करून दिली.
धोत्रे येथे उपसरपंच राजू रोडे यांच्या नेतृत्वाखाली ढवळपुरी फाटा ते धोत्रे अशी मोटारसायकल रॅली काढण्यात आली. २५० मोटारसायकल त्यात सहभागी झाल्या होत्या. आ. लंके यांचा ताफा फाट्यावर पोहोचताच लंके यांनी वाहनातून उतरून ते स्वतः मोटरसायकल चालवायला बसले. त्यामुळे सहभागी तरुणांचा उत्साह द्विगुणीत झाला.
Post a Comment