मुंबई : क्रिकेटच्या मैदानात एखाद्या खेळाडूने अर्ध शतक, शतक, दीडशतकं केले तर समर्थक जल्लोष करीत असतात. द्विशतक केले तर मग फटाक्यांची आतषबाजी केली जाते. मात्र इंधनाच्या बाबीत होणार्या द्विशतकामुळे सगळ्यांच्या डोळ्यात पाणी येणार आहे.
इंधन दरवाढीच्या माध्यमातून केंद्र सरकार लाखो कोटी कमवत आहे. दिवाळीच्या तोंडावर देखील पेट्रोल अन् डिझेलची दरवाढ सुरुच असल्याने सर्वसामान्यांची दिवाळी केंद्र सरकार कडू करणार असल्याची चिन्हे आहेत.
१५ ऑक्टोपासून रोज पेट्रोल व डिझेलच्या दरात ३५ पैसे ते ३८ पैशांची वाढ झालेली आहे. एकत्र दरवाढ करण्यापेक्षा रोज थोडी थोडी दरवाढ करण्याचे धोरण केंद्र सरकारने अवलंबलेले दिसून येत आहे. याद्वारे पेट्रोल अन् डिझेल आता वर्ष अखेरीस द्विशतक करणार की काय? असा धसका सामान्य नागरिकांनी घेतला आहे.
पेट्रोल-डिझेलच्या दरवाढीतून लोकांना मोफत कोरोना लस दिली जात असल्याचे खळबळजनक वक्तव्य मध्यंतरी केंद्रीय पेट्रोलियम राज्यमंत्री रामेश्वर तेली यांनी केले होते. केंद्र सरकारने यावर अधिकृत भूमिका जाहीर केलेली नाही. याचाच अर्थ इंधनावरील करातून केंद्र सरकार लाखो कोटींचा मलिदा जमवत आहे. अशी टीका राष्ट्रवादी काँग्रेसने सोशल मिडियातून केली आहे.
पेट्रोल अन् डिझेलच्या दरवाढीमुळे सर्वसामान्यांचे आर्थिक गणित मोडत चालले आहे. ही दरवाढ कमी व्हावी, अशी मागणी होत असली तरी अद्याप त्यावर लक्ष देण्यात आलेले नाही.
Post a Comment