कर्जत : कर्जत बाजार समितीच्या दोन जागेच्या फेर मतमोजणीनंतर आमदार राम शिंदे यांच्या कर्जत तालुका स्वाभिमानी शेतकरी विकास पॅनल व आमदार रोहित पवार यांच्या सहकार व शेतकरी विकास आघाडी पॅनलच्या समसमान 9-9 जागा कायम राहिल्या. फेर मतमोजणीत कोणताही बदल घडला नाही.
फेरमतमोजणीत परिस्थिती जैसे थे राहत याउलट आक्षेप घेतलेल्या भरत पावणे आणि लीलावती जामदार यांचे एक मत कमी झाले. महिला राखीवमध्ये मतमोजणीत अवैध मतांची संख्या 4 होती आजच्या फेर मतमोजणीत 6 झाली.
यामुळे सुवर्णा कळसकर व लीलावती जामदार यांच्या मतांमध्ये अवघे दोन मतांचा फरक पडल्याने कळसकर दोन मतांनी विजयी ठरल्या.
कर्जत कृषी उत्पन्न बाजार समितीच्या प्रतिष्ठेच्या व चुरशीच्या लढतीत आमदार राम शिंदे व आमदार रोहित पवार यांच्या पॅनलला समसमान 9-9 जागा मिळाल्या होत्या. भाजपाचे उमेदवार भरत पावणे आणि लीलावती जामदार यांनी 29 एप्रिलच्या मतमोजणीवर आक्षेप घेतल्याने आज सेवा सोसायटीच्या 9 जागेसाठी फेर मतमोजणी पार पडली.
फेरमतमोजणी कक्षात फक्त नियुक्त राजकीय प्रतिनिधींच यांनाच प्रवेश दिला. सकाळी 8 वाजता सुरू झालेली मतमोजणी दुपारी दीड वाजता पूर्ण झाली. यामध्ये दोन्ही पॅनलच्या 9-9 जागा कायम राहिल्या. तसेच विजयी उमेदवारांत देखील बदल घडला नाही.
मतांची संख्या एक-एक वाढल्याने आणि कमी झाल्याने विजयी अनुक्रमांकात मात्र बदल झाला. राष्ट्रवादीचे संग्राम पाटील आणि गुलाब तनपुरे यांचे एक-एक मत वाढले. तर भाजपाचे नंदराम नवले आणि आक्षेप घेतलेले भरत पावणे यांचे एक- एक मत कमी झाले.
Post a Comment