कर्जत : कर्जत कृषी उत्पन्न बाजार समितीच्या अध्यक्षपदी जिल्हा बँकेचे संचालक काकासाहेब तापकीर यांची तर उपाध्यक्षपदी अभय पाटील यांची निवड झाली.
कर्जत कृषी उत्पन्न बाजार समितीच्या निवडणुकीत मोठ्या प्रमाणात चुरस निर्माण झाली होती. भाजपचे आमदार राम शिंदे व जिल्हा बँकेचे संचालक अंबादास पिसाळ यांच्या नेतृत्वाखालील पॅनेल ला 9 तर आ. रोहित पवार यांच्या नेतृत्वाखालील पॅनेल ला 9 जागा मिळाल्या होत्या.
प्रत्येकी 9 जागा मिळाल्या असल्याने अध्यक्ष व उपाध्यक्ष पदांची निवड ही दोन्ही आमदार यांच्यासाठी प्रतिष्ठेची झाली होती. यात कोण बाजी मारणार की ईश्वर चिठ्ठीने निवड होणार याकडे संपूर्ण राज्याचे लक्ष लागले होते.
आ. राम शिंदे यांनी मात्र अध्यक्ष व उपाध्यक्षपदाच्या निवडीत आ. रोहित पवार यांना धोबीपछाड देत कृषी उत्पन्न बाजार समितीची सत्ता हस्तगत केली आहे.
अध्यक्षपदासाठी भाजपकडून जिल्हा बँकेचे संचालक काकासाहेब तापकीर यांनी तर राष्ट्रवादीतर्फे जिल्हा परिषदचे माजी सदस्य गुलाब तनपुरे यांनी अर्ज दाखल केले होते. मतदान प्रक्रिया सुरु झाली.
शेवटी काकासाहेब तापकीर यांना 9 मते पडली तर गुलाब तनपुरे यांना 8 मते पडली. यावेळी राष्ट्रवादी काँग्रेसचे 1 मत बाद झाले. त्यामुळे काकासाहेब तापकीर हे मत जादा घेत विजयी झाले.
उपाध्यक्ष पदासाठी भाजपचे अभय पाटील यांनी तर राष्ट्रवादीच्या वतीने श्रीहर्ष शेवाळे यांनी अर्ज दाखल केले. यावेळी झालेल्या मतदानात अभय पाटील यांना 10 तर श्रीहर्ष शेवाळे यांना 8मते पडले. त्यामुळे पाटील हे दोन मताने विजयी झाले.
Post a Comment