मुंबई ः विधानसभेला जेव्हढ्या जागा एकनाथ शिंदे गटाला मिळतील, तेव्हढ्यात जागा आम्हाला मिळाल्या पाहिजे, ्से विधान राष्ट्रवादी काॅंग्रेसच्या अजित पवार गटाचे नेते छगन भुजबळ यांनी केले.
राष्ट्रवादी काॅंग्रेसच्या स्थापना दिनानिमित्त आयोजित कार्यक्रमात ते बोलत होते. भुजबळ म्हणाले की, आगामी विधानसभेत सर्वच जाती धर्माच्या लोकांना बरोबरीने घेऊन चालावे लागणार आहे. आगामी विधानसभेत राष्ट्रवादीला ८० जागा मिळायला हव्यात, असे बोललो होतो. त्यानंतर माझ्या विरोधात अनेकजण बोलले. अशाप्रकारे काही बोलू नका, असे मला सांगण्यात आले आहे.
भुजबळ म्हणाले की, माझ्या मते जागावाटपाचे गुहाळ शेवटपर्यंत चालवून त्याचा फायदा आपल्याला होणार नाही. जागावाटपापबाबत लवकर निर्णय घ्यायला हवा, आधी जागा वाटप करून घ्यावे लागणार आहे. त्यानंतर उमेदवार ठरवता येईल. भाजप हा मोठा पक्ष आहे. मोठा भाऊ आहे. आम्ही त्यांना सांगितलं की आमचे सुद्धा ४०-४५ आमदार आहेत.
भुजबळ म्हणाले की, जवळपास तेवढचे आमदार शिंदे गटाचे सुद्धा आहेत. त्यामुळे शिंदे यांना जेवढ्या जागा मिळतील, तेवढ्या जागा आम्हाला सुद्धा मिळाल्या पाहिजे. आता शिंदे यांचे खासदार जास्त निवडून आलेत. त्यामुळे त्यांना जास्त जागा मिळायला हव्यात, असे कोणी म्हणू नये, असे ते म्हणाले.
भुजबळ म्हणाले की, आपण सर्वांनी मिळून ही निवडणूक लढवायला हवी, आपण एक होऊन निवडणूक लढवली तर विधानसभेत सत्ता स्थापन करू शकू, असेही ते म्हणाले. विधासनसभेत उमेदवारी देताना आपल्याला सर्व समाजाचा विचार करावा लागेल. दलित आणि आदिवासींच्या जागा राखीव आहेत. मात्र इतरांना आपल्या बरोबर घ्यावे लागेल. हा मोठा वर्ग आहे. मुस्लिमांना आपण पाठिंबा दिला आहे. अशा वेळी धर्माचा विचार करून चालणार नाही. आपण त्यांच्याबरोबर आहोत, असा विश्वास त्यांनी दिला.
Post a Comment