अहिल्यानगर : यशस्विनी महिला ब्रिगेडच्या अध्यक्षा आणि राष्ट्रवादी काँग्रेसच्या कार्यकर्त्या रेखा जरे यांच्या हत्या प्रकरणातील मुख्य आरोपी दैनिक सकाळचे तत्कालीन निवासी संपादक बाळासाहेब जगन्नाथ बोठे उर्फ बाळ ज. बोठे यांना सर्वोच्च न्यायालयाने जामीन मंजूर केला आहे. अनेक वर्षे तुरुंगात आणि खटला रखडल्यामुळे जामीन मिळावा, या याचिकेवर न्यायालयाने हा निर्णय दिला. बोठे यांच्या वतीने अ‍ॅड. कैलास अवताडे, अ‍ॅड. महेश तवले आणि अ‍ॅड. संजय दुशिंग यांनी काम पाहिले.
रेखा जरे यांची 30 नोव्हेंबर 2020 रोजी अहमदनगर-पुणे महामार्गावरील जातेगाव घाटात गळा चिरून हत्या करण्यात आली होती. या हाय प्रोफाइल प्रकरणात बाळ बोठे यांच्यावर हत्येची सुपारी दिल्याचा आरोप होता. पोलिस तपासात बोठे आणि जरे यांच्यातील प्रेमसंबंध बिघडल्याने आणि बदनामीच्या भीतीने हा खून घडवल्याचे समोर आले होते. बोठे यांच्यासह अन्य 11 आरोपींना पोलिसांनी अटक केली होती, तर हत्येत वापरलेला चाकू आणि इतर पुरावेही जप्त करण्यात आले होते.
हत्येनंतर बोठे सुमारे साडेतीन महिने फरार होते. 13 मार्च 2021 रोजी हैदराबाद येथील बिलालनगर भागातून त्यांना अटक करण्यात आली. पोलिसांनी अत्याधुनिक तंत्रज्ञान आणि सायबर सेलच्या मदतीने त्यांचा शोध घेतला होता. अटकेनंतर बोठे यांनी नगर आणि येरवडा तुरुंगात जीवाला धोका असल्याचा दावा करत नाशिक तुरुंगात हलवण्याची मागणी केली होती. तसेच, त्यांनी अटकेवेळी सुसाइड नोट लिहिल्याचे आणि आजारपणाच्या तक्रारी केल्याचेही समोर आले होते.
या प्रकरणात पोलिसांनी दोन दोषारोपपत्रे दाखल केली. पहिले दोषारोपपत्र 26 फेब्रुवारी 2021 रोजी पाच आरोपींविरुद्ध, तर दुसरे 450 पानांचे पुरवणी दोषारोपपत्र बोठे आणि इतर सहा जणांविरुद्ध 8 जून 2021 रोजी पारनेर न्यायालयात दाखल झाले. बोठे यांनी यापूर्वी जिल्हा न्यायालय आणि मुंबई उच्च न्यायालयाच्या औरंगाबाद खंडपीठात जामीनासाठी अर्ज केले होते, परंतु ते फेटाळले गेले होते.
बोठे यांनी सर्वोच्च न्यायालयात दाखल केलेल्या याचिकेत दीर्घकाळ तुरुंगवास आणि खटल्यातील विलंब यावर भर दिला. या मुद्यांचा विचार करून सर्वोच्च न्यायालयाने त्यांना जामीन मंजूर केला. यापूर्वी बोठे यांच्यावर खंडणीचा गुन्हाही दाखल झाला होता, ज्यामुळे त्यांचे कथित गुन्हेगारी कृत्य अधिक गंभीर स्वरूपाचे मानले गेले होते. तरीही, कायदेशीर लढाईत त्यांच्या वकिलांनी यश मिळवले.
Post a Comment