नेवासा ः गहू व हरभरा पेरणीचा मोसम सुरू असताना ग्रामीण भागातील शेतकरी दुहेरी संकटाला सामोरे जात आहेत. एका बाजूला अति पावसामुळे झालेले नुकसान, तर दुसऱ्या बाजूला बिबट्याच्या वाढत्या वावरामुळे निर्माण झालेला भीतीचा वातावरण आहे. यामुळे रात्रीच्या वेळी शेतीकाम करणे शेतकऱ्यांसाठी धोकादायक बनले आहे.
महावितरणकडून शेतीपंपांसाठी रात्रीचाच वीजपुरवठा सुरू असल्याने शेतकऱ्यांना रात्री शेतात जाण्याची वेळ येत आहे. बिबट्याच्या संचारामुळे जीव धोक्यात घालून शेतात जाणे भाग पडत असल्याने शेतकरी संताप व्यक्त करत आहेत.
शेतकरी बांधवांनी सांगितले की, अतिपावसाने आधीच पिकांचे नुकसान झाले आहे. त्यात रात्री पाणी देण्याची वेळ येते. बिबट्याचा धोका वाढला आहे, त्यामुळे आम्ही घाबरलेलो आहोत. महावितरणकडून रात्रीची वीज देणे हा सरळ अन्याय आहे. या संदर्भात शेतकऱ्यांनी आमदार विठ्ठलराव लंघे यांना कळकळीची विनंती केली आहे की महावितरणने परिस्थितीची गंभीर दखल घेऊन शेतीपंपांना दिवसा वीजपुरवठा सुरू करण्याचे आदेश द्यावेत.
स्थानिक शेतकरी पुढे सांगतात, रात्री धोकादायक वातावरणात शेतात जाणे आम्हाला परवडणारे नाही. तरीही पिके वाचवण्यासाठी आम्हाला जावेच लागते. त्यामुळे दिवसा वीज मिळणे अत्यावश्यक आहे. दरम्यान, शेतकऱ्यांची ही मागणी वाढू लागली असून प्रशासनाने याकडे सकारात्मकपणे पाहावे, अशी अपेक्षा व्यक्त होत आहे.
Post a Comment