श्रीगोंदा : जिल्हा परिषद आणि पंचायत समितीच्या निवडणुकांची रणधुमाळी आता चांगलीच रंगात आली आहे. आरक्षण सोडतीनंतर गट-गणात इच्छूकांची हालचाल वाढली असून, आढळगाव गटात उमेदवारीच्या चर्चांना वेग आला आहे. माजी आमदार बबनराव पाचपुते आणि आमदार विक्रम पाचपुते यांचे खंदे समर्थक म्हणून ओळखल्या जाणाऱ्या पंचशिला रमेश गिरमकर यांच्या नावाला येथे विशेष जोर मिळत आहे.
मागील पंचवार्षिक काळात गिरमकर यांनी केलेल्या कामांची नोंद ठळकपणे पुढे येत आहे. गटातील पाणीपुरवठा, रस्ते सुधारणा, अंगणवाडी इमारतींचे उभारकाम, तसेच महिलांसाठी राबविलेल्या उपक्रमांमुळे त्यांच्या कार्याची दखल स्थानिकांमध्ये व्यापकपणे घेतली गेली.
अनेक ठिकाणी प्रलंबित असलेल्या विकासकामांना गती देत त्यांनी प्रशासनाशी प्रभावी पाठपुरावा केल्याचे गावकऱ्यांचे म्हणणे आहे. त्यामुळे गटातील नागरिकांमध्ये ‘गिरमकर यांना पुन्हा संधी द्यावी’ अशी भावना दृढ होत चालली आहे.
गेल्या काही दिवसांत कार्यकर्त्यांच्या बैठकांना वेग आला असून, गिरमकर यांच्या उमेदवारीसाठी सूचनांची नोंद करण्यात येत आहे. नेतृत्वापर्यंत ही मागणी ठामपणे पोहोचवण्याची तयारी सुरू आहे.
पाचपुते समर्थक गटातील काही ज्येष्ठ पदाधिकाऱ्यांनीही गिरमकर यांच्या नावाला सकारात्मक प्रतिसाद दिल्याची माहिती मिळत आहे.
दरम्यान, इतर इच्छूकांनीदेखील आपापले जनसंपर्क सुरू केले असले तरी, विकासकामांची भक्कम नोंद आणि गटातील मजबूत जनाधार यामुळे गिरमकर यांचे नाव पुढे असल्याचे राजकीय जाणकारांचे मत आहे. पक्षस्तरीय चर्चा अंतिम टप्प्यात पोहोचल्या असून, उमेदवारीवर निर्णय लवकरच जाहीर होण्याची शक्यता वर्तवली जात आहे.
आगामी निवडणूक चुरशीची होणार यात शंका नाही. त्यामुळे आढळगाव गटातील राजकीय वातावरण आणखी तापण्याचे संकेत मिळत आहेत.
Post a Comment