संगमनेर ः शिवसेनेच्या नगराध्यक्षपदाच्या उमेदवार सुवर्णा खताळ यांच्या प्रचार रॅलीला संगमनेर शहरवासीयांकडून जोरदार प्रतिसाद मिळत असून स्थानिक राजकीय वातावरणात या रॅलीची मोठी चर्चा रंगू लागली आहे. विशेषतः महिलांसह तरुणाईने मोठ्या संख्येने उपस्थित राहून खताळ यांच्या नेतृत्वावर ठाम विश्वास व्यक्त केला. “आम्ही तुमच्या पाठीशी आहोत” असा संदेश देत नागरिकांनी त्यांना भक्कम पाठिंबा दर्शवला.
रॅलीची सुरुवात सकाळी उत्साहपूर्ण वातावरणात झाली. सुरुवातीपासूनच महिलांची उपस्थिती लक्षणीय असल्याचे दिसून आले. “सुवर्णाताई आमच्या समस्या समजून घेतात आणि उपायही दाखवतात,” असे सांगत अनेक महिलांनी त्यांच्या विजयासाठी शुभेच्छा दिल्या. महिलांबरोबरच तरुणांचा प्रतिसादही तितकाच उत्साहवर्धक होता. शहराच्या विकासात आधुनिक कल्पना, रोजगारनिर्मिती आणि युवकांसाठी संधी निर्माण करण्याबाबत खताळ यांनी मांडलेली भूमिका तरुणांना भावली.
रॅलीत महिलांचा विशेष सहभाग जाणवला. “शहराचा विकास आधुनिक कल्पनांसह व्हावा, आणि त्यासाठी सुवर्णा खताळ योग्य नेतृत्व देऊ शकतात,” अशी प्रतिक्रिया अनेक तरुणांनी व्यक्त केली. कॉलेज विद्यार्थी, स्थानिक तरुण कार्यकर्ते आणि नवमतदार मोठ्या संख्येने या रॅलीत सहभागी झाले.
सुवर्णा खताळ यांनी सर्वसमावेशक विकासाचा संदेश दिला. पाणीपुरवठा सुधारणा, कचरा व्यवस्थापनातील नवे उपक्रम, रस्ते बांधणी, महिला कल्याण तसेच डिजिटल प्रशासन या विषयांवर त्या मांचत आहेत.
रॅलीदरम्यान स्थानिक शिवसेना पदाधिकारी, कार्यकर्ते आणि नागरिकांची मोठ्या प्रमाणावर गर्दी झाली. घोषणांचा गगनभेदी आवाज, शिस्तबद्ध मिरवणूक आणि उत्साहवर्धक वातावरणामुळे रॅली अधिक यशस्वी ठरली.
संपूर्ण रॅलीतून दिसून आलेली महिलांची आत्मीयता आणि तरुणांचा उत्साह पाहता, आगामी निवडणुकीत सुवर्णा खताळ यांना भक्कम पाठिंबा मिळण्याची शक्यता व्यक्त केली जात आहे. शहराच्या सर्वांगीण विकासासाठी दूरदृष्टी असलेले नेतृत्व आवश्यक असल्याचा नागरिकांचा सूर असून, खताळ यांचा प्रचार दिवसेंदिवस अधिक जोम पकडताना दिसत आहे.
सुवर्णा खताळ यांच्यासह आमदार अमोल खताळ यांच्या पत्नी नीलम खताळ याही प्रचारात सक्रीय सहभागी झालेल्या आहेत. त्यांचा सहभाग कार्यकर्त्यांना पाठबळ देत आहे.
Post a Comment