नेवासा ः नेवासा नगरपंचायत निवडणुकीत भाजप-शिवसेनेने आपला पॅनल उभा करून निवडणुकीत चुरस निर्माण केलेली आहे. या निवडणुकीत उभे राहिलेल्या सर्व युतीच्या उमेदवारांना पालकमंत्री राधाकृष्ण विखे पाटील यांनी दूरध्वनीवरून आज मार्गदर्शन केले.
नेवासा नगरपंचायतीच्या निवडणुकीतील युतीचे नगराध्यक्षपदाचे उमेदवार डाॅ. करणसिंह घुले यांच्या निवासस्थानी युतीची बैठक पार पडली. या बैठकीला आमदार विठ्ठलराव लंघे, उत्तर भाजपचे जिल्हाध्यक्ष नितीन दिनकर, उद्योजक प्रभाकर काका शिंदे, भाऊसाहेब वाघ, जानकीराम डौले, प्रताप चिंधे,प्रकाश निपुंगे, बंडु शिंदे आदींसह युतीचे सर्वच उमेदवार या वेळी उपस्थित होते.
नामदार विखे यांनी या वेळी उमेदवारांना प्रचार कसा करावा, नागरिकांच्या समस्या समजून घेऊन त्यांना सर्व प्रश्न निवडून आणल्यानंतर मार्गी लावण्याचे आश्वासन देण्याबाबत मार्गदर्शन केले. तसेच कोणावरही टीका करताना कोणावरही व्यक्तीगत टीका करू नये. पक्षाचे ध्येयधोरणे प्रत्येकाने पाळावे आदी सूचना या वेळी करून सर्वांना निवडणुकीत विजयी व्हा, अशा सूचना दिल्या. काही अडचण आल्यास थेट आपल्याशी संपर्क साधावा, असे ते म्हणाले.
या वेळी आमदार विठ्ठलराव लंघे, भाजपचे जिल्हाध्यक्ष नितीन दिनकर, उद्योजक प्रभाकर शिंदे यांनीही उपस्थितांना मार्गदर्शन केले. तसेच प्रचाराचे नियोजनाचा आढावा घेतला. युतीचे नगराध्यक्षपदाचे उमेदवार डाॅ. करणसिंह घुले यांनी आभार मानले.
Post a Comment