मुंबई : कोरोनाचा नवा व्हेरिएंटने राज्यात चिंता वाढवली आहे. राष्ट्रीय विषाणू विज्ञान संस्थेने दिलेल्या अहवालानुसार राज्यात आज आणखी आठ रुग्ण ओमायक्रॉन बाधित आढळले आहेत.
ओमायक्रॉन बाधित आढळलेल्या 8 रुग्णांचे नमुने डिसेंबरच्या पहिल्या आठवडयात घेण्यात आलेले आहेत. 8 रुग्णांपैकी 3 स्त्रिया तर 5 पुरुष आहेत. हे सर्व रुग्ण 24 ते 41 वयोगटातील असून 3 रुग्णांना कोणतीही लक्षणे नाहीत तर 5 रुग्णांमध्ये सौम्य स्वरुपाची लक्षणे आढळली आहेत.
यापैकी 7 रुग्ण मुंबईत तर 1 रुग्ण वसई-विरारमध्ये आढळला आहे. प्राथमिक माहितीनुसार यापैकी कोणाचाही आंतरराष्ट्रीय प्रवासाचा इतिहास नाही. यापैकी एकाने बंगलोर तर एकाने दिल्ली प्रवास केला आहे. मुंबईतील एक व्यक्ती राजस्थान मधील आहे.
8 रुग्णांपैकी 2 रुग्णांना रुग्णालयात दाखल करण्यात आलं आहे तर 6 जण घरी विलगीकरणात आहेत. या रुग्णांच्या निकटसहवासितांचा शोध घेण्यात येत आहे. या पैकी 7 रुग्णांचे लसीकरण पूर्ण झालं आहे तर एकाचं लसीकरण झालेलं नाही, अशी माहिती देण्यात आली आहे.
आजपर्यंत राज्यात आता एकूण ओमायक्रॉनची 28 प्रकरणं झाली आहेत. यात मुंबईमध्ये 12, पिंपरी-चिंचवडमध्ये 10, पुणे मनपात 2, कल्याण डोंबिवली, नागपूर, लातूर आणि वसई-विरारमध्ये प्रत्येकी 1 रुग्णाची नोंद झाली आहे.
Post a Comment