शांघाय : चीन व हाँगकाँगमध्ये कोरोनाचा नवा व्हेरियंट अतिशय वेगानं पसरतोय. ब्रिटनमध्ये रूग्णांच्या संख्येत वाढ होत आहे. यातील बहुतांश रूग्ण हे कोरोनाच्या ओमायक्रॉन BA.2 व्हेरियंटचे आहेत. युरोपमध्ये चौथ्या लाटेची भीती व्यक्त होत आहे.
अमेरिकेतील प्रसिद्ध आरोग्य तज्ज्ञ डॉ. अँथनी फाऊसी यांनी आणखी एक धोक्याचा इशारा दिला आहे. रूग्णांचे प्रमाण असंच वाढत राहिले तर बुस्टर डोस किंवा चौथ्या डोसची गरज भासेल असे फाऊसी यांनी म्हटले आहे.
ओमयक्रॉनच्या तुलनेत बीए.2 व्हेरियंट 50 ते 60 टक्के अधिक संक्रामक असल्याचा दावा फाऊसी यांनी केला आहे. त्यामुळेच येत्या काळात युरोपात कोरोना रूग्णांची संख्या झपाट्याने वाढेल. खबरदारीचा उपाय म्हणून लोकांना बुस्टर किंवा चौथा डोस द्यावा लागेल असे फाऊसी यांनी सांगितले आहे.
दुसरीकडे फायझर व मॉडर्ना या दोन कंपन्यांनी लसीचा चौथा डोस तयार केला असून अमेरिकच्या आरोग्य विभागाकडे मंजुरी मागितली आहे.
कोरोनाच्या पहिल्या व दुस-या लाटेत युरोपात मोठ्या प्रमाणात लोकांना आपला जीव गमवावा लागला. त्यामुळे चौथ्या लाटेला कमी लेखण्याची चूक युरोपियन देश नक्कीच करणार नाहीत. त्यादृष्टीनं अमेरिकन सरकारनं हालचाली सुरू केल्या आहेत. आता संभाव्य धोका ओळखून भारतानेही बुस्टर डोसवर भर देण्याची गरज आहे.
Post a Comment