मुंबई ः जात पडताळणी प्रकरणात खासदार नवनीत राणा यांचे वडील हरभजन सिंग कौर यांना शिवडी कोर्टाकडून फरार म्हणून घोषित करण्यात आले आहे. याशिवाय नवनीत राणा व त्यांच्या वडिलांना एक हजार रुपयांचा दंड ठोठावला आहे. सर्वोच्च न्यायालय आणि मुलुंड पोलीस स्टेशनमध्ये दाखल केलेले प्रकरण दोन्हीही वेगवेगळे असल्याचे निरीक्षण शिवडी न्यायालयाने नोंदवले आहे. न्यायालयाने आता एक महिन्याची मुदत दिली आहे, या कालावधीत हजर न झाल्यास प्रॉपर्टी जप्त करण्यात येण्याची शक्यता आहे.
याप्रकरणाची पुढील सुनावणी 16 फेब्रुवारीला आहे. बोगस जात पडताळणी प्रमाणपत्र प्रकरणी अमरावतीच्या खासदार नवनीत राणा यांच्या अडचणीत दिवसेंदिवस वाढ होतेय. त्यांच्यावर काहीच कारवाई होत नसल्याने शिवडी दंडाधिकारी न्यायालयाने नाराजी व्यक्त केली होती. खासदार नवनीत राणांवर कारवाई का होत नाही? आरोपी महाराष्ट्रातच आहे ना? असा सवाल कोर्टाने विचारला होता. नवनीत राणांच्या बोगस जात पडताळणी प्रमाणपत्र प्रकरणात कारवाई करण्यासाठी मुलुंड इथल्या सहाय्यक पोलीस निरीक्षकांनी वेळ मागितला होता.
नवनवीत राणा यांच्यावर जात प्रमाणपत्रासाठी शाळा सोडल्याचा बनावट दाखला दिल्याचा आरोप करण्यात आला आहे. नवनीत राणा यांचे वडिल हरभजन सिंग कौर यांनी फसवणूक करुन प्रमाणपत्र मिळवल्याचा आरोप त्यांच्यावर लावण्यात आला आहे. नवनीत राणा आणि त्यांच्या वडिलांविरोधात मुलुंड पोलीस ठाण्यात तक्रार दाखल करण्यात आली होती. त्यानंतर नवनीत राणा आणि त्यांच्या वडिलांवर गुन्हा दाखल करण्यात आला आहे.
Post a Comment