नेवासा : संकटं येतात तेव्हा नेत्याने कार्यकर्त्यांना विश्वासात घेऊन मन मोकळं केलं पाहिजे. प्रशांत गडाख कोमात असताना त्यांच्यावर फौजदारी गुन्हा दाखल केला. ते आजारी नसताना असा प्रकार केला असता तर त्यांनी तुमची भिंगरी केली असती. आपण तालुका, जिल्हा तसेच राज्य पातळीवर राजकारण केले, असंख्य चढउतार पाहिले, परंतु एवढ्या खालच्या पातळीवरचे राजकारण पाहिले नाही, अशी उद्विग्नता ज्येष्ठ नेते यशवंतराव गडाख यांनी व्यक्त केली.
नेवासा तालुका सहकारी दूध उत्पादक संघातील वीज चोरी प्रकरणी या संघाचे अध्यक्ष सध्या कोमात प्रशांत यांच्यासह संचालकांविरूद्ध गुन्हा दाखल करण्यात आला आहे. त्यासंबंधी कार्यकर्त्यांसमोर बोलताना गडाख यांनी ही खंत व्यक्त केली.
गडाख म्हणाले की, विरोधकांकडे सत्ता असतानाच्या काळात विविध संस्था उभारणीच्या माध्यमातून रचनात्मक कामे करायची सोडून हजारो लोकांचे प्रपंच अवलंबून असलेल्या चांगल्या चालू संस्था मोडकळीस आणण्यासाठी त्यांनी त्यांची राजकीय ताकद खर्च केल्याचा आरोप गडाख यांनी केला. द्वेषाधारित राजकारणातूनच महाभारत घडल्याचे त्यांनी लक्षात ठेवावे, असेही ते म्हणाले.
शंकरराव गडाख म्हणाले, तालुका दूध संघाच्या वीज मिटरची चावी महावितरण अधिकाऱ्यांच्या ताब्यात असताना वेळोवेळी झालेल्या तपासणीत त्यांना वीज चोरी कधीही आढळली नाही. मात्र दहा वर्षांपूर्वीच्या कथित वीज चोरीचा दाखला देऊन पालघरच्या अधिकाऱ्यांमार्फत अचानक दंड ठोठावून पोलीसांत गुन्हाही दाखल कसा झाला? याचे कोडे न उलगडण्याइतपत जनता खुळी राहिलेली नाही, असेही गडाख म्हणाले.
Post a Comment