नेवासा ः जिल्ह्यासह ,राज्यभरात कार्यरत असलेले ज्येष्ठ नेते माजी खासदार यशवंतराव गडाख यांच्या वाढदिवसानिमित्त शुक्रवारी माजी मुख्यमंत्री व शिवसेना उद्धव बाळासाहेब ठाकरे या पक्षाचे पक्षप्रमुख उद्धव ठाकरे व त्यांच्या पत्नी रश्मी उद्धव ठाकरे यांनी सोनई येथील यशवंतराव गडाख यांच्या निवासस्थानी सदिच्छा भेट दिली. या वेळी त्यांनी यशवंतराव गडाख यांना वाढदिवसाच्या शुभेच्छा दिल्या.
याप्रसंगी गडाख कुटुंबियांच्या वतीने आमदार शंकरराव गडाख यांनी स्वागत करून उद्धव ठाकरे व रश्मी ठाकरे यांचा सन्मान केला. याप्रसंगी बोलतांना मा मुख्यमंत्री उद्धव ठाकरे म्हणाले की गेल्या दीड वर्षांपूर्वीच ज्येष्ठ नेते यशवंतराव गडाख यांना भेटायला मला यायचे होते. त्यांचे आशीर्वाद घेऊन आभार मानायचे होते. परंतु त्यावेळेस येता आले नाही.
ज्येष्ठ नेते यशवंतराव गडाख यांनी आमदार शंकरराव गडाख हा लढणारा सैनिक मला संकट काळात दिला आहे. त्यांना मी कधीही विसरणार नाही. माजी खासदार यशवंतराव गडाख यांच्या भेटीमुळे नवी ऊर्जा व लढण्यास बळ मिळाले आहे. ही ऊर्जा घेऊन मी माझा संघर्ष सुरूच ठेवणार आहे. यशवंतराव गडाख यांचे नगर जिल्ह्यासह राज्याच्या विकासात महत्वाचे योगदान आहे.त्यांचे काम दिपस्तंभाप्रमाणे आहे व ते सर्वांना प्रेरणादायी असेच आहे. गडाख यांनी नेवासा तालुक्यातील गावा गावात निसर्ग संवर्धनाचे जे काम केले आहे. ते निश्चितच अभिमानास्पद असेच आहे.
कुटुंब उभे करण्याचे काम गडाख यांनी केले आहे. स्व बाळासाहेब ठाकरे यांच्या पुस्तकाचे प्रकाशन माजी खासदार यशवंतराव गडाख यांच्या हस्ते झाल्याचे व स्व बाळासाहेब ठाकरे व मा खा यशवंतराव गडाख यांच्या मैत्रीच्या आठवणींना उजाळा दिला.
गडाख यांच्या निवासस्थानी भेटीनंतर उद्धव ठाकरे व रश्मी ठाकरे यांनी शनीशिंगणापूर येथे शनीदर्शन घेतले. शनी चौथऱ्यावर जाऊन स्वतः च्या हस्ते विधिवत तेल अर्पण करून उद्धव ठाकरे यांनी दर्शन घेतले. शनी दर्शन प्रसंगी मिलिंद नार्वेकर, विधानसभेचे माजी उपसभापती विजय औटी, नगर उत्तर जिल्हा प्रमुख रावसाहेब खेवरे, नगर दक्षिण जिल्हा प्रमुख राजेंद्र दळवी, महापौर रोहिणी शेंडगे, माजी महापौर भगवान फुलसौंदर, विक्रम राठोड, अभिषेक कळमकर, बाळासाहेब बोराटे, गणेश कवडे, संजय शेंडगे, संभाजी कदम, अशोक गायकवाड, दत्ता जाधव, उद्धव बाळासाहेब ठाकरे गटाचे शिवसैनिक मोठ्या संख्येने उपस्थित होते.
शनि दर्शन केल्यानंतर शनीशिंगणापूर येथे अनेक परप्रांतीय भाविकांनी उद्धव ठाकरे यांच्याशी हस्तआंदोलन करून शुभेच्छा दिल्या याप्रसंगी उपस्थित शिवसैनिकांनी उद्धव ठाकरे जिंदाबादच्या घोषणांनी परिसर दणाणून सोडला होता.
शनीशिंगणापूर देवस्थानच्या वतीने पूर्णत्वास येत असलेल्या पानसनाला सुशोभीकरण प्रकल्पामुळे शनी शिंगणापूरच्या वैभवात भर पडणार आहे व शनिदेवाच्या दर्शनाने मनाला आत्मिक समाधान मिळाले असे उद्धव ठाकरे म्हणाले.
याप्रसंगी सोनई पोलीस स्टेशनचे स पो निरीक्षक माणिक चौधरी शनीशिंगणापूर पोलीस स्टेशनचे पो निरीक्षक रामचंद्र कर्पे यानी चोख बंदोबस्त ठेवला होता.
Post a Comment