नगर ः अहमदनगर लोकसभा मतदारसंघची जागा शरद पवार गट लढविणार आहे. आमदार रोहित पवार यांनी या मतदारसंघातून निवडणूक लढवावी, असे एकमत मुंबईत झालेल्या बैठकीत झालेले आहे. त्यामुळे आता शरद पवार गटाकडून लोकसभेसाठी उमेदवार कोण यावरील चर्चेला तूर्त तरी पूर्ण विराम मिळालेला आहे.
प्रदेशाध्यक्ष जयंत पाटील यांच्या अध्यक्षतेखाली अहमदनगर व शिर्डी मतदारसंघातील आढावा बैठक मुंबईत पार पडली. या बैठकीला राष्ट्रीय अध्यक्ष शरद पवार, खासदार सुप्रिया सुळे, जितेंद्र आव्हाड, पक्ष निरीक्षक अंकुश काकडे आदी उपस्थित होते. या बैठकीला सुरवात झाल्यानंतर राष्ट्रवादीचे जिल्हाध्यक्ष राजेंद्र फाळके यांनी लोकसभा मतदारसंघाचा लेखाजोखा मांडला.
अहमदनगर लोकसभा मतदारसंघात शरद पवार यांना मानणारा वर्ग मोठ्या प्रमाणात असून या जागेवर आपलाच उमेदवार उभा करावा, असे सर्वांनी मत माडंले. या वेळी आमदार रोहित पवार, आमदार प्राजक्त तनपुरे, राष्ट्रवादीचे जिल्हाध्यक्ष राजेंद्र फाळके, डाॅ. अनिल आठरे आदींच्या नावाची चर्चा झाली. यामध्ये आमदार रोहित पवार यांच्या नावावर एकमत झालेले आहे.
रोहित पवार हेच सक्षम उमेदवार आहेत. त्यांनाच पक्षाने उमेदवारी द्यावी, असे सर्वांनी मत मांडले. त्यानंतर रोहित पवार यांच्यानावावर एकमत करण्यात आलेले आहे. त्यामुळे आता शरद पवार गटाकडून उमेदवार कोण याविषयी सुरु असलेल्या चर्चांना पूर्णविराम मिळालेला आहे. परंतु यामध्ये ऐनवेळी एखादवेळेस बदलही होण्याची शक्यता राजकीय वर्तुळात व्यक्त केली जात आहे.
यावेळी माजी आमदार दादाभाऊ कळमकर, प्रताप ढाकणे, अरुण कडू, अभिषेक कळमकर आदी उपस्थित होते. या सर्वांनी आपली मते मांडताना रोहित पवार यांनाच उमेदवार द्यावी, अशी अपेक्षा व्यक्त केली. तरुण चेहरा असून मतदारसंघात त्यांचा चांगला संपर्क आहे. त्यामुळे निवडणुकीत यश आपलाच होईल, असे मतही काहींनी व्यक्त केले आहे.
Post a Comment