जामखेड : मुख्यमंत्री देवेंद्र फडणवीस यांचे अगदीच निकटवर्तीय नेत्यांमध्ये राम शिंदे यांची गणना होते. विधानसभेच्या पराभवानंतर आता विधानपरिषद आमदार प्राध्यापक राम शिंदे यांना विधान परिषदेच्या सभापतीपदी बसवले जाणार आहे.
देवेंद्र फडणवीस यांचे विश्वासू विधान परिषदेचे आमदार प्राध्यापक राम शिंदे यांची विधानपरिषदेच्या सभापतीपदी वर्णी लागणार आहे. विधानसभा निवडणुकीत राम शिंदे कर्जत- जामखेड मधून निवडणुकीच्या रिंगणात होते. मात्र गेल्यावेळी प्रमाणेच याहीवेळी राम शिंदे यांना पराभवाचा सामना करावा लागला.
त्यांचा जेव्हा पराभव होतो तेव्हा पक्षाकडून त्यांना चांगली मोठी जबाबदारी सोपवली जाते. 2019 च्या विधानसभा निवडणुकीत जेव्हा त्यांचा पराभव झाला तेव्हा त्यांना विधान परिषदेवर पाठवण्यात आले आणि त्यांचे पुनर्वसन झाले.
विधान परिषदेवर गेल्यानंतर कर्जत जामखेडमध्ये राम शिंदे यांची राजकीय ताकद फारच वाढली. 2024 च्या निवडणुकीत विधान परिषदेचे आमदार असतानाही त्यांना कर्जत जामखेडची उमेदवारी मिळाली. मात्र याहीवेळी त्यांचा पराभव झाला.
विधानसभा निवडणुकीत पराभव झालेला असतानाही शिंदे यांना लॉटरी लागली आहे. विधानसभा निवडणुकीत भारतीय जनता पक्षाच्या सर्वाधिक जागा निवडून आल्यात आणि यामुळे विधानसभा अध्यक्षाची माळ ही पुन्हा एकदा भाजपाच्या गळ्यात पडली. दरम्यान भाजपा आता विधान परिषदेच्या सभापती पदासाठी देखील आग्रही आहे.
विधानपरिषद सभापती पदासाठी राम शिंदे यांचे नाव गेल्या अनेक दिवसांपासून चर्चेत असून आता त्यांच्या नावावर शिक्कामोर्तब करण्यात आले आहे.
Post a Comment