नेवासा ः नेवासा नगरपालिका निवडणुकीच्या पार्श्वभूमीवर भाजप–शिवसेना युती आक्रमक प्रचाराची तयारी करत आहे. मात्र दोन दिवसांपूर्वी झालेल्या उमेदवारांच्या प्रचार शुभारंभ सभेतच संघटनातील ढासळलेले नियोजन उघड झाल्याने युतीने स्वतःच दिलेला प्रमुख मुद्दा विरोधकांनी हातोहात उचलला आहे.
प्रचाराचा नारळ वाढविण्याचा कार्यक्रम असताना संपूर्ण सभेचे नियोजन विस्कळीत असल्याचे स्पष्टपणे दिसून आले. मंडपाची उभारणी वेळेत न होणे, बसण्याची व्यवस्था आणि कार्यक्रमाची दिशाहीनता या सर्वामुळे उपस्थित नागरिक व कार्यकर्त्यांमध्ये असंतोष निर्माण झाला. इतकेच नव्हे तर एका प्रमुख नेत्याने स्वतःच मंचावरून आयोजकांना “नियोजन चांगले करा, अशी स्पष्ट कानउघाडणी केली.
यामुळे सभेचे वातावरण बदलून गेले. आणि याच क्षणापासून सोशल मीडियावर या घटनेचा मोठ्या प्रमाणात व्हिडीओ क्लिपद्वारे प्रसार होऊ लागल्याने युतीच्या प्रतिमेला धक्का बसला. यावरच विरोधक तुटून पडले आहेत.
क्रांतिकारी शेतकरी पक्षाचे तसेच राष्ट्रवादी काँग्रेस (अजित पवार गट)चे पदाधिकारी म्हणतात “ज्यांना मंडप नीट उभारता येत नाही, त्यांना शहराचा विकास कसा काय करणार? नेत्यांना सल्ले द्यावे लागावेत इतके संघटन कमकुवत झाले आहे.
हीच युतीची खरी क्षमता!” विरोधकांनी युतीच्या ढिसाळ नियोजनाची तुलना त्यांच्या सत्ताकाळातील विकास योजनांशी करत, “दमडीचा कार्यक्रम नीट नाही, मग कोट्यवधींचा विकास प्रकल्प काय उभारणार?” असा अप्रत्यक्ष टोलाही लगावला.
नेवाशात या प्रसंगाची जोरदार चर्चा सुरू आहे. नगरपालिकेतील निवडणूक अवघ्या काही दिवसांवर आली असताना युतीला ताकद दाखवायचा पहिला प्रयत्नच डळमळीत ठरला आहे. कार्यकर्त्यांमध्येही ‘नियोजनात गांभीर्य नाही’ अशी नाराजी उमटते आहे. अनेकांचे मत आहे की, पुढील कार्यक्रमात अशा चुका पुन्हा घडल्यास त्याचा थेट परिणाम मतदारांच्या मनावर होणार आहे.
नेवासा तालुक्यातील राजकीय वातावरण आधीच तापलेले असताना युतीच्या या चुकांमुळे विरोधकांच्या हाती नवा दणका मिळालेला आहे. आगामी सभांमध्ये युती नियोजनातील त्रुटी दूर करते का, याकडे नेवाशाचे राजकारण बर्‍याच उत्सुकतेने पाहत आहे.
Post a Comment