नेवासा : नेवासा नगरपंचायतीत सुरू असलेल्या सत्तासंघर्षाचा परिणाम आता केवळ नगरपंचायतीपुरता मर्यादित राहिलेला नसून, त्याचे पडसाद आगामी जिल्हा परिषद, पंचायत समिती आणि ग्रामपंचायत निवडणुकांमध्ये उमटण्याची शक्यता राजकीय वर्तुळात व्यक्त केली जात आहे.
नगरपंचायतीत मतदारांनी कोणत्याही एका गटाला स्पष्ट बहुमत न देता सर्वांना काम करण्याची संधी दिली. मात्र गेल्या काही महिन्यांतील घडामोडी पाहता या संधीचे रूपांतर प्रभावी विकासकामांत झाले नसल्याची भावना नागरिकांमध्ये व्यक्त होत आहे.
नगरपंचायतीत सध्या दोन प्रमुख राजकीय गटांमध्ये सातत्याने संघर्षाचे वातावरण असल्याचे दिसून येत आहे. आरोप-प्रत्यारोप, तक्रारी आणि राजकीय वाद यामध्ये विकासाची गती मंदावल्याची चर्चा होत आहे. शहरातील रस्ते, पाणीपुरवठा, स्वच्छता, वीज आणि नागरी सुविधांशी संबंधित प्रश्न अद्यापही प्राधान्याने सुटले नसल्याची नागरिकांची तक्रार आहे.
अलीकडे झालेल्या मुळा सहकारी साखर कारखान्याच्या निवडणुकीत या संघर्षाचा ठोस परिणाम दिसून आला नसला, तरी स्थानिक स्वराज्य संस्थांच्या आगामी निवडणुकांमध्ये त्याचे प्रतिबिंब उमटू शकते. नगरपंचायतीतील वातावरणाचा प्रभाव संपूर्ण तालुक्याच्या राजकारणावर पडण्याची शक्यता नाकारता येत नाही.
गेल्या सहा महिन्यांच्या कालावधीत नगराध्यक्ष आणि नगरसेवकांकडून अपेक्षित गतीने विकासकामे झाल्याचे चित्र दिसत नसल्याची चर्चा आहे. त्याऐवजी राजकीय संघर्ष आणि परस्परांवरील आरोपांनाच अधिक महत्त्व मिळाल्याची भावना नागरिक व्यक्त करत आहेत. मतदारांनी विकासासाठी प्रतिनिधी निवडून दिले असताना राजकीय संघर्षाला प्राधान्य दिले जात असल्याने नाराजी वाढत असल्याचे बोलले जात आहे.
या पार्श्वभूमीवर नेवासा तालुक्यात "तिसऱ्या पर्यायाची" चर्चा सुरू झाली आहे. पारंपरिक गटांव्यतिरिक्त विकासाला प्राधान्य देणारे, जनतेत राहून प्रश्न सोडवणारे आणि तालुक्याला नवे नेतृत्व देऊ शकणारे व्यक्तिमत्त्व मतदार शोधत असल्याचे राजकीय जाणकारांचे मत आहे.
याच चर्चेत माजी आमदार बाळासाहेब मुरकुटे यांचे नाव पुन्हा पुढे येत असल्याचे सांगितले जात आहे. त्यांनी पुन्हा सक्रियपणे तालुकाभर संपर्क वाढवून जनतेच्या प्रश्नांवर लक्ष केंद्रित केल्यास आगामी निवडणुकांमध्ये राजकीय समीकरणे बदलू शकतात, असे मत त्यांच्या समर्थकांसह काही राजकीय निरीक्षकांकडून व्यक्त होत आहे.
दुसरीकडे, शंकरराव गडाख आणि विठ्ठलराव लंघे यांच्या नेतृत्वाखालील गटांमधील राजकीय संघर्ष कायम असल्याची चर्चा आहे. या संघर्षाचा थेट परिणाम विकासकामांवर होत असल्याची टीका विरोधकांकडून केली जात असली, तरी संबंधित गटांकडून त्याबाबत वेगवेगळी भूमिका मांडली जात आहे.
आगामी स्थानिक स्वराज्य संस्थांच्या निवडणुकांच्या पार्श्वभूमीवर नेवाशातील राजकीय वातावरण दिवसेंदिवस तापत असून, मतदारांचा अंतिम कौल कोणाच्या बाजूने झुकतो, याकडे संपूर्ण तालुक्याचे लक्ष लागले आहे.
Post a Comment