नेवासा : नेवासा शहरातील महावितरणच्या वीज खांबांवर अनधिकृतपणे टाकण्यात आलेल्या इंटरनेट केबल्सचा प्रश्न दिवसेंदिवस गंभीर होत असताना महावितरणच्या कारवाईत दुजाभाव होत असल्याचा आरोप नागरिकांमधून होत आहे. काही दिवसांपूर्वी हा गंभीर मुद्दा तेजवार्ता न्यूज पोर्टलने सर्वप्रथम उघडकीस आणत प्रशासनाचे लक्ष वेधले. त्यानंतर महावितरणने कारवाई मोहीम सुरू केली. मात्र, या मोहिमेत एका विशिष्ट इंटरनेट सेवा चालकाला जाणीवपूर्वक वगळण्यात आल्याची चर्चा शहरात रंगली आहे.
महावितरणच्या खांबांवर अनधिकृत केबल टाकणे हा नियमांचा भंग असताना काहींच्या केबल हटविल्या जात आहेत, तर एका चालकाच्या केबल मात्र अद्यापही खांबांवर कायम आहेत. त्यामुळे महावितरणच्या कारवाईवरच प्रश्नचिन्ह निर्माण झाले असून, "नियम सर्वांसाठी सारखे की निवडकांसाठी वेगळे?" असा सवाल नागरिक उपस्थित करत आहेत.
याप्रकरणी आणखी एक गंभीर चर्चा तालुक्यात सुरू आहे. संबंधित इंटरनेट सेवा चालक हा तालुक्यातील एका माजी आमदारांचे प्रसिद्धीचे काम पाहत असल्याने त्यांच्या टीमकडून त्या केबल हटवू नयेत यासाठी प्रयत्न सुरू असल्याची चर्चा राजकीय वर्तुळात रंगली आहे. त्यामुळे महावितरणवर राजकीय दबाव आहे का, अशीही शंका व्यक्त केली जात आहे.
नागरिकांचे म्हणणे आहे की, अनधिकृत केबलमुळे वीज खांबांवर गुंतागुंत वाढत असून शॉर्टसर्किट, आग लागणे किंवा विजेचा धक्का लागून जीवितहानी होण्याचा धोका नाकारता येत नाही. अशा परिस्थितीत एखादी दुर्घटना घडली तर त्याची जबाबदारी महावितरण घेणार का, संबंधित इंटरनेट चालक घेणार की राजकीय पाठबळ देणारे घेणार, असा संतप्त सवाल नागरिकांनी उपस्थित केला आहे.
महावितरणने कोणत्याही दबावाला बळी न पडता सर्व अनधिकृत केबलधारकांवर समान कारवाई करावी, अन्यथा ही मोहीम केवळ दिखाऊ असल्याचा आरोप अधिक तीव्र होईल, अशी मागणी नागरिकांकडून होत आहे.
नागरिकांचे थेट प्रश्न
- एकाच नियमाची दोन वेगवेगळी मापदंड का?
- एका इंटरनेट चालकालाच अभय का?
- राजकीय दबावाखाली कारवाई थांबवली का?
- अपघात झाल्यास जबाबदार कोण?
महावितरणने स्पष्ट करावे...
- संबंधित इंटरनेट चालकावर कारवाई का झाली नाही?
- त्याला अधिकृत परवानगी आहे का?
- सर्व केबलधारकांची यादी जाहीर करणार का?
- कारवाईचे निकष नेमके काय आहेत?
Post a Comment